ბლოგი

აქ, ახლა დაფინანსებული თევზსაჭერი გემის ეკონომიკური ეფექტი

სეექტემბერი 2020

ფოთი. 2020 წელი. ოქტომბერი. აქ,ახლა.

მრავალწლიანი პაუზის შემდეგ, პირველად დაფინანსდა ახალი თევზსაჭერი გემის მშენებლობა. ფოტოზე, ფოთის საზღვაო სასწავლო-საწვრთნელ ცენტრში ხელი ეწერება პირველ სამმხრივ მემორანდუმს თიბისი ლიზინგს, აწარმოე საქართველოსა და თევზსაჭერი გემის მფლობელს, გოჩა ლაბარტყავას შორის. ეს მოვლენა საქართველოს ეკონომიკაში ახალი თავია. ეს არის ინვესტიცია, რომელიც ერთი ბიზნესის გარდა, ეკონომიკურ ეფექტს უფრო დიდ მასშტაბზე მოახდენს.

თევზჭერის მიმართულება ქვეყნის ეკონომიკის განვითარებისთვის მნიშვნელოვან დარგებში გასული წლიდან ჩაეწერა. და მართლა, საქართველოს მრავალმხრივ რესურსს შორის ერთ-ერთი— წყალია, რაც თევზჭერის დარგის გასავითარებლად ბუნებრივია, რომ ყველაზე მნიშვნელოვანი ფაქტორია. გარდა ამისა, აღსანიშნავია ისიც, რომ შავ ზღვაში ისტორიულად შტორმები ნაკლებად იცის, ყველაზე შტორმიან წელიწადშიც კი, შესაძლებელია გემი ზღვაში 100-ჯერ, 120-ჯერ გავიდეს. ბუნების ხელშეწყობა გვაქვს და თუ ამ სფეროში არსებულ პოტენციალს ოპტიმალურად ავითვისებთ, თევზჭერის საქმიანობის მასშტაბი გაიზრდება და აღნიშნულ დარგში უფრო და უფრო მეტი ადამიანი ჩაერთვება.

და მაინც, მნიშვნელოვანია ითქვას რა დატვირთვას ატარებს ეს მოვლენა ქვეყნისთვის, თევზჭერის მიმართულებისა თუ ქართველი მეთევზეებისთვის.

აქ, ახლა პირველი დაფინანსებული გემი ადგილობრივი მეთევზეებისთვის ნიშნავს შესაძლებლობას, შეიძინონ თანამედროვე სტანდარტის თევზსაჭერი გემი, მაშინ როცა ამ ეტაპზე, საქართველოს საზღვაო ფლოტი ვერ უზრუნველყოფს სათანადო რაოდენობით თევზის რეწვას. ახალი გემი თევზების სხვა, უფრო მომგებიანი კატეგორიების მოცვას შეძლებს, ვიდრე ქართულ თევზსაჭერ ფლოტში არსებული ძველი გემები და მეთევზეებს მისცემს საშუალებას, რომ საწყის ეტაპზეც კი, წარმადობა დაახლოებით 300%-ით გაზარდონ.

გარდა ამისა, დაფინანსებული გემი გულისხმობს, რომ თევზმჭერი ფლოტი მნიშვნელოვნად განახლდება, დარგში თანამედროვე ტექნოლოგიები დაინერგება, ეს ყველაფერი ერთად კი, შედეგად მოიტანს თევზჭერის პროდუქტების ასორტიმენტისა და გაყიდვების გეოგრაფიის მნიშვნელოვან ზრდას და ახალი სამუშაო ადგილების გაჩენას.

მიხეილ ხიდურელი
“აწარმოე საქართველოში” დირექტორი

ეს არ არის პირველი და უკანასკნელი პროექტი, ჩვენ, ფინანსურ ორგანიზაციებთან ერთად უკვე ვმუშაობთ რამდენიმე გემის დაფინანასების საკითხზე, რაც წაადგება ფოთს, წაადგება ქვეყანას და გაზრდის საქართველოში თევზჭერის პროდუქტიულობას.

პირველი დაფინანსებული გემის მფლობელი, გოჩა ლაბარტყავა, უკვე წლებია ჩართულია მეთევზეობის სფეროში. ის წლების განმავლობაში ქართულ წყლებში შემოსულ ქაფშიაზე (ხამსა) თევზაობდა, რომელიც შავი ზღვის ძირითად რესურსს წარმოადგენს.

ახლადდაფინანსებული ნორვეგიული წარმოშობის ვიკინგური ტიპის გემი აღჭურვილია თანამედროვე ტექნიკითა და ქისა ბადით, რომელიც სპეციალურად ქაფშიას დასაჭერად არის გათვლილი. გოჩა ლაბარტყავას თქმით, თუ ძველი გემით წარმადობა 4 ტონას შეადგენდა, აქ, ახლა ეს მონაცემი 300-400 ტონამდე გაიზრდება.

თანამედროვე სტანდარტის გემი თევზების სხვა, უფრო მომგებიანი კატეგორიების მოცვას შეძლებს და საქართველოში წარმადობას დაახლოებით 300%-ით გაზრდის.

ნორვეგიიდან ჩამოტანილი გემის პროექტზე იმუშავებს ტრაბზონში არსებული, ერთ-ერთი წამყვანი გემთმშენებელი კომპანია MIMARINE და დეკემბერში გემი საქართველოს წყლებში შემოვა.

ასე რომ, თამამად შეიძლება ითქვას ლიზინგის დაფინანსების არეალს ახალი, უმსხვილესი მიმართულება — თევზჭერა შეემატა. მიმდინარე პროცესებს ქვეყანა მიჰყავს ადგილობრივი მეთევზეების გაძლიერებასა და ჩვენი ფლოტით თურქული სეინერების ჩანაცვლებისკენ. გარდა ამისა, შავი ზღვის ქართულ სანაპიროზე დაჭერილი თევზი ადგილობრივ მეწარმეებს აძლევს საშუალებას სამომავლოდ ნედლი პროდუქტის და მისი გადამუშავებით მიღებული საკვების ექსპორტი ევროპის სხვადასხვა ქვეყანაში განახორციელონ და სექტორი ამ კუთხითაც გააძლიერონ.

ეს არის პირველი ნაბიჯი ამ სფეროს გაჯანსაღებისთვის. დღეს, თევზჭერა არის განვითარებადი ბიზნესი, რომელსაც მხარდაჭერა სჭირდება. თიბისი ლიზინგი გააგრძელებს ფლოტის ჩანაცვლებაში მონაწილეობის მიღებას და ქართული ფლოტის ახალი ქართული გემებით დაკომპლექტებას.

გაგა გოგუა
თიბისი ლიზინგის გენერალური დირექტორი


ავტორი: ნინჩო ბალანჩივაძე